भगवाधारी रेपिस्टला पद्मश्री : भारतीय सर्वोच्च सन्मानाची विटंबना
भारत सरकारने यावर्षी कार्तिक महाराज उर्फ कृष्ण चंद्र मिश्रा यांना पद्मश्री पुरस्कार देऊन एक धक्कादायक आणि संतापजनक निर्णय घेतला आहे. हा पुरस्कार, जो सामाजिक कार्य आणि देशासाठी उल्लेखनीय योगदानासाठी दिला जातो, अशा व्यक्तीला प्रदान करणे, ज्याच्यावर गंभीर बलात्कार, लैंगिक शोषण आणि फसवणुकीचे आरोप आहेत, हा भारतीय समाजाच्या नैतिकतेवर आणि सरकारच्या निर्णयप्रक्रियेवर प्रश्नचिन्ह उपस्थित करतो. केंद्र सरकार हा नेमका कोणता संदेश देऊ इच्छिते? की, गंभीर गुन्ह्यांचे आरोप असलेल्या व्यक्तींना सन्मानित करणे हा आता नवीन सामान्य आहे? की, भगव्या वस्त्रांचा आडोसा घेऊन गुन्हे करणाऱ्या तथाकथित ‘महाराजांना’ देशाच्या सर्वोच्च नागरी सन्मानाने गौरवले जाईल?
कृष्ण चंद्र मिश्रा, जे स्वतःला कार्तिक महाराज म्हणवतात, यांच्यावर एका महिलेने अत्यंत गंभीर आरोप केले. मुर्शिदाबाद, पश्चिम बंगाल येथील नबग्राम पोलीस ठाण्यात दाखल तक्रारीनुसार, या भगवाधारी बाबाने नोकरीच्या बहाण्याने तिला आपल्या आश्रमात बोलावले, तिला शिक्षक म्हणून नियुक्त केले आणि त्यानंतर तिच्यावर ६ महिन्यात १२ वेळा वारंवार लैंगिक अत्याचार केले. इतकेच नव्हे, तर जबरदस्तीने गर्भपात आणि फसवणूक यासारखे गंभीर गुन्ह्यांचा पण त्याच्यावर ठपका ठेवण्यात आला आहे. अशा व्यक्तीला, ज्याच्यावर अजूनही कायदेशीर चौकशी सुरू आहे आणि ज्याच्या कृत्यांनी एका महिलेचे आयुष्य उद्ध्वस्त केले, त्याला पद्मश्रीसारखा मानाचा पुरस्कार देणे हा देशातील प्रत्येक सुज्ञ नागरिकाचा अपमान आहे.
हा पहिलाच प्रसंग नाही जिथे भारतीय जनता पार्टी (भाजप) आणि त्यांच्या सरकारवर गुन्हेगारी प्रवृत्तीच्या व्यक्तींना पाठिशी घालण्याचे आरोप होत आहेत. यापूर्वी गुजरातमध्ये बलात्काराच्या गुन्ह्यांशी संबंधित व्यक्तींचे हार-तुरे घालून स्वागत झाल्याच्या बातम्या समोर आल्या होत्या. आता तर केंद्र सरकारने एका पायरी पुढे जाऊन अशा तथाकथित ‘महाराजाला’ थेट पद्मश्री पुरस्काराने सन्मानित केले आहे. याचा अर्थ काय? की, भगवे कपडे घालून, आश्रमाच्या नावाखाली गुन्हे करणाऱ्या माणसांना देशाच्या सर्वोच्च सन्मानाने नवाजले जाईल? की, महिलांवरील अत्याचारांचे आरोप असलेल्यांना सरकार संरक्षण देईल? हा निर्णय म्हणजे देशातील महिलांच्या सुरक्षिततेचा आणि न्यायव्यवस्थेचा थट्टाच आहे.
पद्मश्री हा पुरस्कार देशातील थोर व्यक्तींना त्यांच्या अतुलनीय योगदानासाठी दिला जातो. परंतु, कार्तिक महाराजासारख्या व्यक्तीला हा पुरस्कार देऊन सरकारने या सन्मानाची प्रतिष्ठा धुळीला मिळवली आहे. ज्या व्यक्तींनी खरोखरच समाजासाठी आपले आयुष्य वेचले, ज्यांनी शिक्षण, विज्ञान, कला, क्रीडा किंवा इतर क्षेत्रात देशाचे नाव उज्ज्वल केले, त्यांना या भगवाधारी ढोंगी महाराजाच्या बरोबरीने बसवले जाणे हे त्यांच्यासाठी अपमानास्पद आहे. खरे तर, अशा व्यक्तींना या पुरस्काराचा सन्मान वाटणार का? की, त्यांना या पुरस्काराचा अभिमान वाटण्याऐवजी लाज वाटेल?
कार्तिक महाराजासारख्या व्यक्ती भगव्या वस्त्रांचा आडोसा घेऊन आपल्या काळ्या कृत्यांना पांघरूण घालतात. भगवे वस्त्र हे अध्यात्म, संन्यास आणि त्यागाचे प्रतीक आहे, परंतु अशा ढोंगी बाबांनी या पवित्र रंगाला कलंकित केले आहे. सरकारने अशा व्यक्तींना सन्मानित करून या पवित्र रंगाचा आणि भारतीय संस्कृतीचा अवमान केला आहे. हे थांबले पाहिजे. भगव्या वस्त्रात लपलेल्या या राक्षसांना उघडे करणे आणि त्यांना कठोर शिक्षा देणे गरजेचे आहे.
केंद्र सरकारने कार्तिक महाराज यांना पद्मश्री पुरस्कार देऊन आपली संवेदनशीलता आणि जबाबदारी यांचा अभाव दाखवला आहे. हा निर्णय म्हणजे देशातील महिलांवरील अत्याचारांना प्रोत्साहन देणारा आणि न्याय व्यवस्थेची थट्टा करणारा आहे. सरकारने तातडीने या पुरस्काराचा फेरविचार करावा आणि कार्तिक महाराज यांच्यावरील आरोपांची निष्पक्ष चौकशी करून दोषी आढळल्यास त्यांना कठोर शिक्षा द्यावी. अन्यथा, हा पुरस्कार आणि सरकारची विश्वासार्हता दोन्ही कायमचे डागाळली जाईल. देशातील जनता आता मूक राहणार नाही; ती या ढोंगीपणाविरुद्ध आवाज उठवेल आणि न्यायाची मागणी करेल!
-डॉ. रियाज़ देशमुख, एसीपी (रि), छत्रपती संभाजी नगर
