लेखणीचा निर्भीड आवाज ठरला 'समाजरत्न'! ज्येष्ठ पत्रकार आरेफ देशमुख यांच्या २३ वर्षांच्या कर्तृत्वाचा भव्य गौरव
छत्रपती संभाजीनगर, १७ जुलै | (प्रतिनिधी) : पत्रकारिता ही केवळ बातम्या देण्याचे माध्यम नसून समाजातील अन्यायाला वाचा फोडणारे आणि सत्तेला जाब विचारणारे प्रभावी लोकशाहीचे शस्त्र आहे. अशाच निर्भीड, वस्तुनिष्ठ आणि समाजहिताची बांधिलकी जपणाऱ्या पत्रकारितेचा मानाचा मुजरा करत ज्येष्ठ पत्रकार आरेफ देशमुख यांना राष्ट्रीय भ्रष्टाचार विरोधी समितीच्या वर्धापन दिनानिमित्त प्रतिष्ठेचा 'समाजरत्न' पुरस्कार प्रदान करण्यात आला. गेली तब्बल २३ वर्षे जनसामान्यांच्या प्रश्नांसाठी निडरपणे लेखणी चालविणाऱ्या या पत्रकाराचा झालेला गौरव म्हणजे समाजाभिमुख पत्रकारितेचाच सन्मान असल्याची भावना यावेळी व्यक्त करण्यात आली.
भारतरत्न मौलाना आझाद रिसर्च सेंटरच्या सभागृहात शुक्रवारी झालेल्या भव्य पुरस्कार वितरण सोहळ्यात विविध क्षेत्रांतील मान्यवरांच्या उपस्थितीत हा सन्मान प्रदान करण्यात आला. पुरस्कार स्वीकारताना सभागृह टाळ्यांच्या कडकडाटाने दुमदुमून गेले आणि उपस्थितांनी उभे राहून आरेफ देशमुख यांच्या कार्याला सलाम केला.
राष्ट्रीय भ्रष्टाचार विरोधी समितीच्या वतीने दरवर्षी समाजातील विविध क्षेत्रांत उल्लेखनीय कार्य करणाऱ्या व्यक्तींचा गौरव केला जातो. यंदाच्या वर्षी पत्रकारिता क्षेत्रात समाजाच्या प्रश्नांना सातत्याने न्याय मिळवून देण्यासाठी, प्रशासनातील त्रुटींवर निर्भीडपणे प्रकाश टाकण्यासाठी आणि लोकहिताचे विषय प्रभावीपणे मांडण्यासाठी आरेफ देशमुख यांची 'समाजरत्न' पुरस्कारासाठी निवड करण्यात आली.
'पत्रकारिता म्हणजे सामाजिक जबाबदारी' या विचाराला दिले आयुष्य
आरेफ देशमुख यांनी पत्रकारितेला कधीही केवळ उपजीविकेचे साधन मानले नाही. समाजातील वंचित, पीडित आणि सामान्य नागरिकांच्या प्रश्नांना न्याय मिळवून देण्याची सामाजिक जबाबदारी म्हणून त्यांनी पत्रकारिता स्वीकारली. विकासकामांतील त्रुटी, प्रशासकीय अनियमितता, लोकांच्या मूलभूत समस्या, सामाजिक प्रश्न आणि अन्यायाविरोधातील आवाज त्यांनी सातत्याने बुलंद केला. त्यांच्या वृत्तांकनात तथ्य, संतुलन आणि धाडस यांचा सुरेख संगम असल्याने त्यांनी पत्रकारिता क्षेत्रात स्वतःची स्वतंत्र आणि विश्वासार्ह ओळख निर्माण केली आहे.
निर्भीड पत्रकारितेचा गौरव
पुरस्कार प्रदान करताना मान्यवरांनी सांगितले की, समाजाच्या हितासाठी लेखणी झिजवणाऱ्या पत्रकारांचा सन्मान होणे ही लोकशाहीसाठी अत्यंत सकारात्मक बाब आहे. पत्रकारितेतील निष्ठा, प्रामाणिकपणा आणि जनहिताची भूमिका यामुळेच आरेफ देशमुख आज अनेक तरुण पत्रकारांसाठी प्रेरणास्थान ठरले आहेत.
यावेळी उपस्थित मान्यवरांच्या हस्ते त्यांना सन्मानचिन्ह, सन्मानपत्र आणि पुष्पगुच्छ देऊन गौरविण्यात आले. त्यांच्या कार्याचा गौरव करताना उपस्थितांनी भविष्यातही त्यांची लेखणी समाजहितासाठी अशीच प्रभावीपणे चालत राहो, अशा शुभेच्छा दिल्या.
मान्यवरांची उल्लेखनीय उपस्थिती
या सोहळ्यास आरटीओ विजय काठोळे, सहाय्यक पोलीस आयुक्त सागर देशमुख, दामिनी पथकाच्या पोलिस उपनिरीक्षक लता जाधव, संपादक शारेक नक्शबंदी, खुलताबादचे नगराध्यक्ष आमेर पटेल, राष्ट्रीय भ्रष्टाचार विरोधी समितीचे राष्ट्रीय प्रमुख सय्यद साबेर, संस्थापक सचिव मोहम्मद अखिल अहमद रामपुरे, मालेगावचे माजी नगरसेवक शेख शफीक, हमिदोद्दीन शमशोद्दीन, महाराष्ट्र उपाध्यक्ष अब्दुल कय्यूम, मराठवाडा अध्यक्ष राजकुमार सूर्यवंशी, परभणी शहराध्यक्ष सुनील लहाने, जिल्हाध्यक्ष अलीम बेग, हाफीज अली, समाजसेवक साजिद मौलाना यांच्यासह विविध क्षेत्रांतील मान्यवर मोठ्या संख्येने उपस्थित होते.
राष्ट्रीय प्रमुख सय्यद साबेर यांनी समितीच्या कार्याचा आढावा घेत भ्रष्टाचाराविरोधातील जनजागृती, तक्रार निवारण आणि सामाजिक उत्तरदायित्वाच्या माध्यमातून समिती सातत्याने कार्यरत असल्याचे सांगितले. समाजासाठी निःस्वार्थपणे कार्य करणाऱ्या व्यक्तींना प्रोत्साहन मिळावे, यासाठी अशा पुरस्कारांचे आयोजन केले जात असल्याचे त्यांनी स्पष्ट केले.
कार्यक्रमाचे प्रभावी सूत्रसंचालन एम. एम. शेख यांनी केले, तर राजकुमार सूर्यवंशी यांनी उपस्थितांचे आभार मानले. राष्ट्रगीताने कार्यक्रमाची सांगता झाली.
समाजासाठी निडरपणे आवाज उठवणाऱ्या पत्रकाराच्या लेखणीचा झालेला हा गौरव केवळ एका व्यक्तीचा नाही, तर सत्य, निर्भीडता आणि लोकहिताची कास धरणाऱ्या पत्रकारितेच्या मूल्यांचाही सन्मान असल्याची भावना संपूर्ण सोहळ्यात प्रकर्षाने व्यक्त होत होती.
