जालना रोडवरील अतिक्रमणांवर मनपाची जोरदार कारवाई, 180 बांधकामं पाडली : सोमवारी पुढील कारवाई

छत्रपती संभाजी नगर, 11 जुलै: छत्रपती संभाजीनगरात मोंढा नाका ते एपीआय कॉर्नर रस्त्यावर महानगरपालिकेने जोरदार अतिक्रमण हटाव मोहीम राबवली. शुक्रवारी सकाळपासून ही मोहीम सुरू झाली, ज्यात 180 पक्की आणि कच्ची बांधकामं, जसं की हॉटेल्स, दुकानं, शेड्स, कंपाऊंड, गॅरेज, कमानी, जाहिरात फलक वगैरे पाडण्यात आलं. ही कारवाई महापालिका आयुक्त जी. श्रीकांत यांच्या आदेशानुसार आणि अतिक्रमण विभागाचे नियंत्रण अधिकारी संतोष वाहुळे यांच्या देखरेखीखाली झाली.

         या मोहिमेत महापालिकेचे 350 आणि पोलिसांचे 250 कर्मचारी सहभागी होते. 15 जेसीबी, 4 पोकलॅन, 15 टिप्पर, 2 रुग्णवाहिका, 2 कोंडवाडा वाहनं, 2 अग्निशमन बंब आणि 5 इलेक्ट्रिक हायड्रॉलिक वाहनांचा वापर झाला. नगररचना विभागाचे उपसंचालक मनोज गर्जे, कार्यकारी अभियंता अमोल कुलकर्णी, पोलिस उपायुक्त प्रशांत स्वामी, अतिक्रमण उपायुक्त सविता सोनवणे यांच्यासह अनेक अधिकारी आणि कर्मचारी या कारवाईत सामील होते.

        आज 8 मालमत्ताधारकांना नोटिसा देण्यात आल्या, तर 19 जणांना सोमवारी नोटिसा दिल्या जाणार आहेत. जालना रोडवर मोंढा नाक्यापासून सेव्हन हिल उड्डाणपूलापर्यंत 45 मीटर रस्त्याच्या दोन्ही बाजूंनी मोजणी करून अतिक्रमण हटवलं गेलं. सिंधी कॉलनीतल्या गुरुद्वाराच्या कमानीला 7 दिवसांत काढण्यासाठी मुदत देण्यात आली. आकाशवाणी सिग्नलवर काही मालमत्ताधारकांना दुपारपर्यंत वेळ दिली गेली, त्यानंतर दुपारी 3 वाजता पुन्हा कारवाई सुरू झाली.

        काल गुरुवारी बाबा पेट्रोल पंप ते मोंढा नाका उड्डाणपूलापर्यंत 229 मालमत्तांच्या संरक्षण भिंती पाडल्या गेल्या. आज मोंढा नाक्यापासून सेव्हन हिलपर्यंत 22.5 मीटरपर्यंत मार्किंग करून अतिक्रमण काढलं. सिंधी कॉलनीतल्या दुकानांचे अडीच फूट बांधकाम पाडलं गेलं. आकाशवाणीसमोर अतिक्रमण काढताना सहाय्यक आयुक्त अर्चना पवार यांच्या पायाला लोखंडी पाईप लागल्याने त्यांना दुखापत झाली. तरीही त्यांनी उपचारानंतर काम सुरू ठेवलं.

      मोंढा नाक्यापासून पुढे आकाशवाणी केंद्र आणि मराठवाडा गोदावरी खोरे पाटबंधारे महामंडळाच्या कार्यालयाच्या संरक्षण भिंती काढण्यासाठी नोटिसा दिल्या गेल्या. शिवशक्ती कॉलनीतल्या लक्ष्मीनारायण मंदिराजवळच्या मनपाच्या 5 दुकानांवर बेकायदा बांधकामं आढळली. ती दुकानं सील करण्याचे आदेश संतोष वाहुळे यांनी दिले. तसंच, काही पत्र्याच्या शेडमधील दुकानं संध्याकाळपर्यंत काढण्यासाठी वेळ देण्यात आली.

      सेव्हन हिल उड्डाणपूलासमोर शिवा ट्रस्टच्या इमारतीच्या पायऱ्या बाधित असल्याने त्या पाडल्या गेल्या. त्यामुळे इमारतीत जाण्या-येण्याचा त्रास झाला. पुढे 60 मीटरच्या जालना रोडवर एमआयडीसी आणि सिडकोच्या भूखंडांवरील मालमत्तांची मोजणी झाली. काही प्रतिष्ठित व्यावसायिक मालमत्तांना मनपाची परवानगी असल्याने त्यांना बांधकाम काढण्यासाठी वेळ देण्यात आला.

     शनिवार आणि रविवारी दोन दिवस विश्रांती घेऊन ही मोहीम सोमवारपासून पुन्हा सुरू होणार आहे, असं संतोष वाहुळे यांनी सांगितलं.