व्हॉट्सॲप मिररिंगचा फास; बिल्डरला ५० लाखांचा गंडा! मालकाच्या नंबरवरून मॅनेजरला मेसेज; आणखी ३६ लाख मागितल्यावर फसवणूक उघड, तक्रारीला चार दिवसांचा विलंब का?

छत्रपती संभाजीनगर, दि. ९ : एपीके फाईल आणि व्हॉट्सॲप मिररिंगचा वापर करून शहरातील बांधकाम व्यावसायिक राजेश भारुका कमलनयन यांना सायबर चोरट्यांनी तब्बल ५० लाख रुपयांचा गंडा घातल्याची धक्कादायक घटना समोर आली आहे. मोबाईलचा ताबा घेतल्यानंतर चोरट्यांनी व्यावसायिकाच्या मोबाईल क्रमांकावरून त्यांच्या मॅनेजरला मेसेज पाठवून दिल्लीतील एका बँक खात्यावर ५० लाख रुपये आरटीजीएसद्वारे पाठविण्यास सांगितले.

     मालकाच्या मोबाईल क्रमांकावरूनच मेसेज आल्याने मॅनेजर अशोक सपाटे यांना संशय आला नाही. त्यांनी सिडको परिसरातील ॲक्सिस बँकेतून दिल्ली येथील ‘थॉट टेक इक्विपमेंट्स’च्या बँक ऑफ इंडिया खात्यावर ५० लाख रुपये आरटीजीएसद्वारे वर्ग केले. त्यानंतरही चोरट्यांनी आणखी ३६ लाख रुपयांची मागणी केल्याने मॅनेजरला संशय आला.

     त्यानंतर त्यांनी थेट मालक राजेश भारुका कमलनयन यांच्याशी संपर्क साधला. त्यावेळी आपण असा कोणताही मेसेज पाठविला नसल्याचे स्पष्ट झाल्याने सायबर फसवणुकीचा प्रकार उघडकीस आला. मात्र तोपर्यंत ५० लाख रुपये वेगवेगळ्या बँक खात्यांमध्ये वळविण्यात आल्याचे समोर आले.

एपीके फाईलने घेतला मोबाईलचा ताबा?

     सायबर चोरट्यांनी संबंधित बांधकाम व्यावसायिकाच्या आर्थिक व्यवहारांचा अभ्यास केल्यानंतर त्यांच्या मोबाईलवर एपीके फाईल पाठविल्याचा संशय आहे. ही फाईल नकळत इन्स्टॉल झाल्यानंतर चोरट्यांना मोबाईलचा ताबा मिळाला असावा, असा प्राथमिक संशय व्यक्त करण्यात येत आहे. त्यानंतर व्हॉट्सॲप मिररिंगच्या माध्यमातून मालकाच्या क्रमांकावरून मॅनेजरशी संपर्क साधण्यात आल्याचे तक्रारीत नमूद आहे.

५० लाखांची फसवणूक; तक्रार मात्र चार दिवसांनी!

     या प्रकरणातील सर्वात महत्त्वाचा आणि संशय निर्माण करणारा मुद्दा म्हणजे ५० लाख रुपयांची एवढी मोठी रक्कम गेल्यानंतरही पोलिसांत तातडीने तक्रार का करण्यात आली नाही? फसवणूक ३ सप्टेंबर रोजी झाल्याचे सांगण्यात येत असताना तक्रार तब्बल चार दिवसांनी, म्हणजे ७ सप्टेंबर रोजी सिडको एमआयडीसी पोलीस ठाण्यात दाखल करण्यात आली.

     विशेष म्हणजे तक्रार उशिराने दाखल करण्यामागील नेमके कारण काय, याचा स्पष्ट उल्लेख फिर्यादीत करण्यात आलेला नसल्याचे सांगण्यात येते. एवढ्या मोठ्या रकमेची सायबर फसवणूक झाल्यानंतर तातडीने पोलिसांकडे धाव घेणे आणि संबंधित बँक खात्यांना ‘फ्रीझ’ करण्याची प्रक्रिया सुरू करणे महत्त्वाचे ठरते. तक्रार तत्काळ दाखल झाली असती तर आरोपींना पैसे इतर खात्यांमध्ये वळविण्यापासून रोखण्याची किंवा रक्कम गोठविण्याची शक्यता अधिक राहिली असती.

     त्यामुळे तक्रार दाखल करण्यास चार दिवसांचा विलंब नेमका का झाला? हा तपासातील अत्यंत महत्त्वाचा प्रश्न ठरणार आहे. एवढी मोठी रक्कम गमावल्यानंतरही तक्रार दाखल करण्यास विलंब होण्यामागे काही ठोस कारण होते का, याचा तपास पोलिसांना करावा लागणार आहे.

खरोखर मोबाईल हॅक झाला होता का?

     दरम्यान, या प्रकरणात फिर्यादीचा मोबाईल प्रत्यक्षात हॅक झाला होता का, एपीके फाईल नेमकी कशी इन्स्टॉल झाली, व्हॉट्सॲप मिररिंग कशा पद्धतीने करण्यात आले आणि ५० लाख रुपये कोणकोणत्या खात्यांमध्ये वळविण्यात आले, याचा तपास होणे आवश्यक आहे. मोबाईल व डिजिटल फॉरेन्सिक तपासातून या प्रश्नांची उत्तरे मिळण्याची शक्यता आहे.

     तसेच, ५० लाखांची रक्कम ज्या खात्यात प्रथम जमा झाली, तेथून पुढे ती कोणत्या खात्यांमध्ये वळविण्यात आली, त्या खात्यांचे धारक कोण आहेत आणि या संपूर्ण व्यवहारामागे कोणाचा सहभाग आहे, याचाही तपास पोलिसांसमोर महत्त्वाचा असेल.

फसवणूक की काही वेगळे गूढ?

     प्रकरण पोलिसांत दाखल झाले असले तरी तपास पूर्ण होण्यापूर्वी कोणत्याही निष्कर्षापर्यंत पोहोचणे घाईचे ठरेल. मात्र मोबाईल खरोखर हॅक झाला होता का, व्हॉट्सॲप मिररिंगचा वापर झाला का, ५० लाखांचा व्यवहार नेमका कसा झाला आणि तक्रार दाखल करण्यास चार दिवसांचा विलंब का झाला, या सर्व प्रश्नांची उत्तरे तपासातून स्पष्ट होणे आवश्यक आहे. पोलिसांनी या सर्व शक्यता तपासून वस्तुस्थिती समोर आणणे गरजेचे आहे.

     या प्रकरणी सिडको एमआयडीसी पोलीस ठाण्यात राजेश भारुका कमलनयन यांच्या तक्रारीवरून गुन्हा क्र. ५५९/२०२६ अन्वये भारतीय न्याय संहितेच्या कलम ३०८, ३१८(४), ३१९(२) तसेच माहिती तंत्रज्ञान कायद्याच्या कलम ६६(ड) व ६६(ई) नुसार गुन्हा दाखल करण्यात आला आहे. या प्रकरणाचा तपास पोलीस निरीक्षक शेषराव खटाणे करीत आहेत.

आता या प्रकरणात पोलिसांच्या तपासातून नेमके काय समोर येते, चार दिवसांच्या विलंबाचे गूढ उलगडते का आणि ५० लाखांच्या या व्यवहारामागे खरे सायबर चोरटे कोण आहेत, हे पाहणे महत्त्वाचे ठरणार आहे.