हबीब-ए-आलम चॅरिटेबल ट्रस्टतर्फे विद्यार्थिनींना आत्मनिर्भरतेसाठी सन्मानित

औरंगाबाद, १९ डिसेंबर:: हबीब-ए-आलम चॅरिटेबल ट्रस्ट तर्फे चांदमारी भागातील अल्पसंख्याक समुदायातील सात विद्यार्थिनींनी  शिवणकला व टेलरिंगचे प्रशिक्षण यशस्वीपणे पूर्ण केले. ट्रस्टने या विद्यार्थिनींना 18 डिसेंबर 2024 रोजी प्रशिक्षणाचा समारोप करताना प्रमाणपत्रांसोबत शिवणकामाच्या मशिनी मोफत वितरित केल्या. या उपक्रमामुळे या विद्यार्थिनींना आर्थिक स्वावलंबनासाठी प्रेरणा मिळाली आहे.

        कार्यक्रमाच्या अध्यक्षस्थानी ट्रस्टचे अध्यक्ष मसूद आलम होते. त्यांनी प्रशिक्षणाची गरज, त्यामागील उद्देश, व विद्यार्थिनींच्या कष्टाचे कौतुक केले. मसूद आलम यांनी सांगितले की, "स्वावलंबनाच्या दिशेने ही विद्यार्थिनींनी टाकलेले पहिले पाऊल त्यांच्या जीवनात मोठा बदल घडवेल. त्यांना व्यावसायिक स्वरूपात पुढे नेण्यासाठी ट्रस्ट सदैव त्यांच्या पाठीशी आहे."

         विशेष म्हणजे, या संपूर्ण प्रशिक्षण सत्राच्या आयोजनामध्ये न्यू नंदनवन भागातील रिजवान खान यांचा मोठा वाटा होता. मसूद आलम यांनी त्यांचे विशेष आभार मानले व त्यांच्या योगदानाला दाद दिली.

         शिवणकामाचे प्रशिक्षण मिळवणाऱ्या या विद्यार्थिनींनी सांगितले की, "आमच्यासाठी हा केवळ एक प्रशिक्षण कार्यक्रम नव्हता, तर स्वप्नांना साकार करण्यासाठी एक मंच होता. आता आम्ही या कौशल्याच्या मदतीने स्वतःसाठी रोजगार निर्माण करू शकतो."

        हबीब-ए-आलम चॅरिटेबल ट्रस्टने सामाजिक विकासासाठी एक महत्त्वाची भूमिका बजावली आहे. अल्पसंख्याक महिलांच्या सक्षमीकरणासाठी तसेच त्यांना स्वयंपूर्ण बनवण्यासाठी ट्रस्टने विविध उपक्रम राबवले आहेत. हे शिवणकाम प्रशिक्षण त्याच प्रयत्नांपैकी एक आहे.

        हा कार्यक्रम केवळ विद्यार्थिनींसाठीच नव्हे, तर समाजातील इतर महिलांसाठीही प्रेरणादायक ठरला आहे. "मूलभूत कौशल्ये मिळवणे हीच आत्मनिर्भरतेची पहिली पायरी आहे," असे ट्रस्टच्या वतीने सांगण्यात आले.

         हबीब-ए-आलम चॅरिटेबल ट्रस्टचा हा प्रयत्न समाजातील महिलांना स्वावलंबनासाठी प्रोत्साहित करत असल्याने कौतुकास पात्र ठरतो. या उपक्रमातून महिलांना केवळ आर्थिक स्थैर्यच नाही, तर आत्मसन्मानही मिळतो. हा कार्यक्रम अनेकांसाठी प्रेरणादायी ठरत आहे.