पुणे टाईम बॉम्ब : आतंकवादी 'शिवाजी' ATS च्या जाळ्यात

पुणे | प्रतिनिधी : पुण्यातील हडपसर परिसरात उघडकीस आलेल्या टाईम बॉम्ब प्रकरणाने संपूर्ण राज्यात खळबळ उडाली असून, दहशतवादविरोधी पथकाने (ATS) सोलापूर जिल्ह्यातील आतंकवादी शिवाजी राठोड याला वर्धा जिल्ह्यातील पुलगाव रेल्वे स्थानक परिसरातून ताब्यात घेतल्याची माहिती समोर आली आहे. हडपसरमधील खासगी रुग्णालय परिसरात ठेवण्यात आलेल्या संशयास्पद पिशवीत टाईम बॉम्ब आढळल्यानंतर पुणे पोलिस, बॉम्ब शोधक व नाशक पथक, ATS तसेच गुप्तचर यंत्रणा तातडीने सक्रिय झाल्या होत्या.

     या संपूर्ण प्रकारामुळे पुण्यात काही काळ भीती आणि तणावाचे वातावरण निर्माण झाले होते. विशेष म्हणजे, घटनास्थळी सापडलेल्या साहित्यामध्ये टायमर यंत्रणा असल्याने हा केवळ दहशत पसरवण्याचा प्रयत्न होता की मोठ्या घातपाताचा कट, याबाबत तपास यंत्रणा गंभीरतेने चौकशी करत आहेत.

रुग्णालय परिसरात संशयास्पद पिशवी; शहरात एकच खळबळ
     मिळालेल्या माहितीनुसार, हडपसरमधील उषाकिरण रुग्णालयाजवळ एका पिशवीबाबत संशय व्यक्त करण्यात आला. स्थानिक नागरिकांनी व सुरक्षा रक्षकांनी पोलिसांना माहिती दिल्यानंतर बॉम्ब शोधक पथक घटनास्थळी दाखल झाले. तपासादरम्यान त्या पिशवीत टाईम बॉम्ब असल्याचे निदर्शनात आले.

     टाईम बॉम्ब निष्क्रिय करण्यासाठी बॉम्ब शोधक पथकाने तातडीने परिसर बंद केला. रुग्णालय परिसर रिकामा करण्यात आला. अनेक तास नागरिकांना त्या भागात प्रवेश रोखण्यात आला होता. प्राथमिक माहितीनुसार, सुमारे सात तासांचा टायमर सेट करण्यात आल्याचा संशय व्यक्त केला जात आहे.

CCTV फुटेजमधून संशयिताचा माग
     घटनास्थळ परिसरातील सोसायट्या, दुकाने आणि रस्त्यांवरील CCTV फुटेज तपासताना तपास यंत्रणांना एक संशयित तरुण इलेक्ट्रिक दुचाकीवरून येताना दिसून आला. त्याने काही वेळ परिसरात हालचाल केल्यानंतर टाईम बॉम्ब असलेली पिशवी ठेवली आणि काही मिनिटांतच तेथून निघून गेल्याचे फुटेजमध्ये दिसल्याची माहिती सूत्रांनी दिली.
यानंतर ATS ने राज्यभर शोधमोहीम सुरू केली. मोबाईल लोकेशन, तांत्रिक माहिती, रेल्वे हालचाली, कॉल डिटेल्स आणि गुप्त माहितीच्या आधारे तपासाचा फास आवळण्यात आला. अखेर वर्धा जिल्ह्यातील पुलगाव रेल्वे स्थानक परिसरातून आतंकवादी शिवाजी राठोड याला ताब्यात घेण्यात आले.

मोठ्या दहशतवादी कटाचा भाग?
     या संपूर्ण घटनेमागे मोठे षड्यंत्र असल्याची शक्यता तपास यंत्रणांनी नाकारलेली नाही. संशयिताला स्फोटक साहित्य कोठून मिळाले, त्याला मदत करणारे इतर साथीदार आहेत का, महाराष्ट्राबाहेरील कोणाशी संपर्क होता का, याचा शोध ATS घेत आहे.

     तसेच काही हिंदु कट्टरवादी विचारसरणीशी संबंधित संघटनांशी आरोपीचा काही संबंध होता का, याचाही तपास सुरू असल्याचे सूत्रांचे म्हणणे आहे. मात्र अधिकृतरीत्या कोणत्याही संघटनेचा सहभाग सिद्ध झालेला नसून तपास पूर्ण होईपर्यंत निष्कर्ष काढणे घाईचे ठरेल, असे वरिष्ठ अधिकाऱ्यांनी स्पष्ट केले आहे.

ATS, IB, NIA मैदानात
     या प्रकरणाचे गांभीर्य लक्षात घेता ATS बरोबरच केंद्रीय गुप्तचर संस्था IB आणि राष्ट्रीय तपास संस्था NIA यांच्याही हालचाली वाढल्या आहेत. संशयिताची कसून चौकशी सुरू असून, त्याच्या मोबाईलमधील माहिती, सोशल मीडिया संपर्क, आर्थिक व्यवहार आणि प्रवासाची माहिती तपासली जात आहे.

     तपास यंत्रणांच्या मते, वेळेत कारवाई झाली नसती तर मोठी दुर्घटना घडण्याची शक्यता नाकारता आली नसती.

पुण्यात वाढवला पोलिस बंदोबस्त
     घटनेनंतर पुणे शहरातील महत्त्वाच्या ठिकाणी पोलिस बंदोबस्त वाढवण्यात आला आहे. रेल्वे स्थानके, बसस्थानके, रुग्णालये, मॉल्स आणि गर्दीच्या ठिकाणी तपासणी मोहीम सुरू करण्यात आली. संशयास्पद वस्तू किंवा हालचाली दिसल्यास तातडीने पोलिसांना माहिती देण्याचे आवाहन प्रशासनाने नागरिकांना केले आहे.

अनेक प्रश्न अनुत्तरित
• रुग्णालयच लक्ष्य का निवडले गेले?
• आरोपी एकटाच होता की त्याच्या मागे मोठे जाळे आहे?
• स्फोटक साहित्य कुठून आले?
• सोशल मीडियातून कट्टरतेचा प्रभाव होता का?
• महाराष्ट्रात आणखी कुठे अशाच प्रकारचा कट रचला गेला होता का?
       या सर्व प्रश्नांची उत्तरे आता तपासातून समोर येणार असून, संपूर्ण राज्याचे लक्ष या प्रकरणाकडे लागले आहे.