औरंगाबाद महानगरपालिकेची "उधळपट्टी" की गरज?

          औरंगाबाद महानगरपालिकेने स्वामी विवेकानंद उद्यानात १५ कोटींच्या खर्चाने पाळीव कुत्र्यांसाठी पार्क तयार करण्याचा घेतलेला निर्णय हा अनेक प्रश्न निर्माण करतो. महानगरपालिकेचा हा प्रकल्प जनतेच्या मूलभूत समस्यांवर प्राधान्य देण्याऐवजी नक्कीच "फॅन्सी" प्रकल्प वाटतो.

            शहरातील अनेक भागांत रस्त्यांचे अर्धवट डांबरीकरण, अस्वच्छता, पाणीटंचाई आणि वाहतूक कोंडी यांसारख्या समस्या गंभीर आहेत. नागरिकांना पिण्यासाठी शुद्ध पाणी, सार्वजनिक स्वच्छतागृहे, आणि सुस्थित रस्ते पुरवण्याऐवजी महानगरपालिकेने पाळीव प्राण्यांसाठी पार्क उभारणीस प्राधान्य दिले आहे.

        या प्रकल्पासाठी लागणारा निधी, जो मूलभूत विकासकामांवर खर्च होऊ शकतो, तो अशा प्रकारच्या प्रकल्पांवर खर्च केला जात आहे. तसेच, महानगरपालिकेच्या प्रस्तावित अंदाजपत्रकात अशा अनावश्यक खर्चामुळे सामान्य नागरिकांवर आर्थिक कराचा बोजा पडण्याची शक्यता आहे.

        महानगरपालिकेने शहरातील समस्या सोडवण्यावर अधिक भर दिला पाहिजे. पाळीव प्राण्यांसाठी पार्क बांधणे ही चांगली कल्पना असली तरी ती सध्याच्या घडीला प्राधान्यक्रमावर येणे उचित नाही.

          महानगरपालिकेने असा अनावश्यक खर्च टाळून सामान्य नागरिकांच्या मूलभूत गरजांवर लक्ष केंद्रित करणे, हीच वेळेची गरज आहे. अशा प्रकल्पांवर होणारा खर्च "लोकहितासाठी" आहे का, याचा विचार प्रत्येक नागरिकाने जरूर करावा.