औरंगाबाद मध्ये बोगस कमांडो भरती; तिघे अटकेत

औरंगाबाद : बेरोजगार तरुणांना महाराष्ट्र कमांडो फोर्समध्ये भरती होण्याचे आमिष दाखवून तिघांनी बोगस भरतीचे आयोजन केले. या भरतीदरम्यान हुबेहूब पोलिस भरतीसारख्या मैदानी चाचण्या घेतल्या गेल्या, मात्र यामागे फसवणूक असल्याचा पर्दाफाश झाला. सिटी चौक पोलिसांनी या प्रकरणी तिघांना अटक केली आहे.

          मराठवाडा सांस्कृतिक मंडळाच्या मैदानावर 17 डिसेंबर रोजी ही भरती आयोजित करण्यात आली होती. यात 1200 मीटर धावणे आणि गोळाफेक अशा मैदानी चाचण्या घेण्यात आल्या. चाचणीत 92 उमेदवारांना निवडण्यात आले व 25 डिसेंबर रोजी अंतिम प्रक्रियेसाठी पुन्हा बोलावण्यात आले. मात्र, निवड झालेल्या उमेदवारांकडून 6 हजार रुपये शुल्क मागितल्यावर अनेकांना संशय आला.

      विशाल मोहन देवळी, विकास बापू माने, आणि सनी लाला बागाव या तिघांनी उमेदवारांचा विश्वास जिंकण्यासाठी लष्कराच्या गणवेशाचा वापर केला. पात्र उमेदवारांना 12 हजार मासिक वेतनाचे आमिष दाखवले आणि 11 महिन्यांच्या कराराची अट घातली. मात्र, उमेदवारांनी काही कागदपत्रांची मागणी करताच फसवणुकीचा पर्दाफाश झाला.

          फसवणूक लक्षात येताच संतप्त उमेदवारांनी आरोपींना थेट सिटी चौक पोलीस ठाण्यात नेले. पोलिसांनी तिघांविरुद्ध गुन्हा दाखल करून त्यांना अटक केली.

          विशालचा भाऊ लष्करात कार्यरत आहे, तर सनीने सिव्हिल इंजिनिअरिंगचे शिक्षण घेतले आहे. मात्र, विशाल आणि विकास फक्त बारावी पास आहेत. या फसवणुकीतून तरुणांचे पैसे लाटण्याचा त्यांचा डाव पोलिसांच्या सतर्कतेमुळे उधळला गेला.

          पोलिसांनी केलेल्या वेळीच कारवाईमुळे अनेक तरुण फसवणुकीपासून वाचले आहेत. या तिघा आरोपींवर कठोर कारवाई होणार असून, सध्या ते जेलमध्ये आहेत.