वक्फ बोर्ड चेअरमनच्या विरुद्ध FIR करण्याचे CEO चे आदेश : परंतु FIR का दाखल नाही? - सैयद आरिफ अली यांचा सवाल. पहा व्हिडिओ

नाशिक: सय्यद आरिफ अली यांनी महाराष्ट्राचे राज्यपाल आणि मुख्यमंत्री यांना पत्र पाठवून बीड पोलिस ठाण्यावर "संगीन मस्जिद" वक्फ मालमत्तेसंदर्भात योग्य कायदेशीर कारवाई करून एफआयआर दाखल करण्याची मागणी केली आहे.

            अंबेजोगाई, बीड येथे स्थित संगीन मस्जिद ही महाराष्ट्र राज्य वक्फ बोर्डाकडे नोंदणीकृत असून, तिच्या मालकीची २७६ एकर जमीन आहे. या जमिनीची अंदाजे बाजारमूल्य सुमारे ३०० कोटी रुपये आहे. तथापि, या मालमत्तेशी संबंधित काही अनियमित व्यवहार झाल्याचा आरोप करण्यात आला आहे.

         या संदर्भात यापूर्वीही सय्यद आरिफ अली यांनी न्यायालयाचा दरवाजा ठोठावला असून, बॉम्बे हायकोर्टाच्या औरंगाबाद खंडपीठात "मोहम्मद सलीमुद्दीन विरुद्ध बाबुराव धोंडीबा साठे व इतर" या प्रकरणाची सुनावणी सुरू आहे. महाराष्ट्र राज्य वक्फ बोर्डाचे मुख्य कार्यकारी अधिकारी (CEO) यांनी या प्रकरणात प्रतिज्ञापत्र सादर केले असून, त्यात संगीन मस्जिद वक्फ संपत्ती असल्याचे स्पष्ट नमूद आहे.

          वक्फ बोर्डाच्या सीईओंनी बीडच्या जिल्हा वक्फ अधिकाऱ्याला आदेश दिले होते की, या संपत्तीवरील बेकायदेशीर व्यवहारांविरोधात एफआयआर दाखल करावा. तथापि, पोलिसांनी अद्याप कोणतीही कारवाई केलेली नाही. त्यामुळे सय्यद आरिफ अली यांनी राज्यपालांना हस्तक्षेप करण्याची विनंती केली आहे.

          या प्रकरणात सय्यद आरिफ यांनी समीर गुलाम नबी काझी यांच्यावर गंभीर आरोप केले आहेत. ते सध्या महाराष्ट्र राज्य वक्फ बोर्डाचे अध्यक्ष असून, राजकीय संबंधांचा वापर करून कायदेशीर कारवाई टाळण्याचा प्रयत्न करीत असल्याचा आरोप करण्यात आला आहे.

              राज्यपाल आणि मुख्यमंत्र्यांनी त्वरित बीड पोलिस ठाण्याला एफआयआर दाखल करण्याचे निर्देश द्यावेत, अशी मागणी त्यांनी केली आहे. तसेच, त्यांना या प्रकरणाची माहिती वैयक्तिकरित्या मांडण्याची संधी द्यावी, अशी विनंतीही केली आहे.